Abair le do chairde!!
Fógraí
Slimathon Mhic Dara - Seachtain a 1
D'éirigh leis na rannpháirtithe uilig 7 gcloch 6 phúnt go leith meáchana a chailleadh eadarthu. As sin d'éirigh le beirt - Trevor Ó Clochartaigh agus Pádraicín a' Táilliúra ós cionn cloch meáchana a chailleadh eadarthu. Comgháirdeas leo uilig. Fáilte roimh dhaoine nua chuile sheachtain.
Féach thíos roinnt nodanna agus comhairle le meáchan a chailleadh atá curtha ar fáil don Slimathon ag an traenálaí aclaíochta Cliff Jennings
SLIMATHON MHIC DARA 2012
– COMHAIRLE AGUS NODANNA LE MEÁCHAN A CHAILLEADH le Cliff Jennings
1. Coinnigh dialann bia (beidh cinn ar fáil ‘chuile Luan). Is leor, scaití, breathnú ar chuile short atá ite agat in aon lá amháin le tosú ar ghearradh siar. Caithfidh tú CHUILE SHORT a itheann tú a bhreacadh síos le go n-oibreoidh sé seo. Mar sin ná bí ag piocadh as plátaí na ngasúr – caith sa mbruscar iad. Tá sé uilig cloiste cheana againn – ach bíonn an fhírinne searbh. Mar sin breac síos cuid na gcomharsan má bhíonn a leithéid á hithe agat – comhairíonn ‘chuile short (ar an drochuair)
2. Cloígh le 3 bhéile in aghaidh an lae: Bricfeasta/Lón/Dinnéar agus ná bíodh níos mó ná dhá snaic agat. Tá an bricfeasta thar a bheith tábhachtach mar go gcuireann sé an ‘metabolism’ ag obair. Seo an ráta ina mbriseann an corp síos na ‘calories’
3. Ná hith tada tar éis 8pm agus aon cheo a itheann tú thart ar an am seo, bí cinnte gur snaic atá ann. Níor cheart an 3ú béile den lá a ithe tar éis 6pm.
4. Céard is snaic ann: anois caithfidh roinnt againn breathnú arís ar céard go díreach atá i gceist againn le snaic! D’fhéadfá úlla nó dhó a ithe mar snaic nó maidí cáiréid nó soilire le hummus. Seans go bhfuil taithí ag daoine ceapaire cáise mar shampla a ithe mar snaic agus caithfear an méid seo a athrú. Níor cheart go mbeadh níos mó ná 100-150 calorie in aon snaic.
5. Déan iarracht bheith sásta i ndiaidh ‘chuile bhéile in áit bheith ataithe! Ní maith le daoine beatha a chur amú agus is minic go n-itheann muid an iomarca mar nár mhaith linn é a fhágáil inár ndiaidh. Mar sin laghdaigh an méid a chuireann tú de ghnáth ar do phláta – thart ar 25% níos lú. Bain triail as go bhfeicfidh tú. Seans nach bhfuil an cúig nó sé cinn de na spúnóga sin ag teastáil ar chor ar bith.
6. Alcól. Tá fhios againn uilig go bhfuil an t-úfás ‘calories’ i ndeochanna meisciúla. Déan iarracht an méid a ólann tú ‘chuile sheachtain a laghdú. Is féidir é seo a dhéanamh tríd an líon deochanna a ólann tú in aon seisiún amháin a laghdú. Is é atá i gceist le seisiún ná roinnt deochanna a bheith dá n-ól le chéile – sa bpub nó cúpla gloine fíona sa mbaile. Mar sin is féidir 2 ghloine fíona a ól in áit 3 cinn nó 3 phionta in áit 4 cinn! Is féidir an líon seisiún a laghdú freisin ar ndóigh!
7. Ná caill an iomarca meáchain rósciobtha. Is leor cúpla punt in aghaidh na seachtaine. Seans go gcaillfidh tú níos mó ná sin sa gcéad seachtain ach tá sé sin ceart go leor. Cuimhnigh – seans gur thóg sé na blianta an meáchan a chur in airde. Má dhéanann tú iarracht an meáchan a chailleadh rósciobtha ceapfaidh do chorp go bhfuil ganntan beatha ort agus déanfaidh sé iarracht an tsaill a choinneáil. Coineoidh do chorp an tsaill agus dófaidh sé an méid atá i do chuid matáin ina h-áit. Íslíonn sé seo ráta an metabolism. Seo í an phríomh-chúis go gcuireann daoine meáchain in airde arís nuair a stopann siad ag leanacht aiste bia, go háirithe nuair a chailleann siad meáchan ró-sciobtha.
8. Tá an aclaíocht thar a bheith tábhachtach nuair atá tú ag iarraidh meáchan a chailleadh. Níl a dhóthain spáis anseo len é a mhíniú i gceart ach go simplí má éiríonn leat ruainne beag aclaíochta a dhéanamh ar maidin cuireann sé seo dlús leis an metabolism agus mairfidh a éifeacht ar feadh uaireanta an chloig. Sa tslí seo leanfaidh an corp ar aghaidh ag dó calories fiú nuair nach bhfuil tú ag aclaíocht. Cinnteoidh sé freisin go láidreoidh do chuid matán – rud a ardóidh ráta an metabolism i do chorp.
Eolas bunúsach an méid atá thuas le tús a chur leis an bpróiseas. In imeacht na seachtainí agus de réir mar atá daoine ag dul i dtaithí ar an méid thuas cuirfidh mé tuilleadh eolais ar fáil.
